தேனாண்டாள் பிலிம்ஸ் சார்பில் ராம நாராயணன் எழுதி இயக்கும் படம் ‘குட்டி பிசாசு’. சங்கீதா, பேபி கீர்த்திகா, ராம்ஜி, ரம்யா கிருஷ்ணன் நடித்துள்ளனர். இப்படத்தின் பாடல் வெளியீட்டு விழா, சென்னையில் நடந்தது. டைரக்டர் ஷங்கர் வெளியிட, கே.பாலசந்தர், பாரதிராஜா பெற்றுக்கொண்டனர். இதையடுத்து 120 படங்களை இயக்கிய ராம நாராயணனுக்கு பாராட்டு விழா நடந்தது. சன் பிக்சர்ஸ் தலைமை செயல் அதிகாரி ஹன்ஸ்ராஜ் சக்சேனா, பெப்சி தலைவர் வி.சி.குகநாதன், பிலிம்சேம்பர் தலைவர் கல்யாண், வினியோகஸ்தர்கள் சங்க தலைவர் ஜி.சேகரன், தியேட்டர் அதிபர்கள் சங்க தலைவர் அபிராமி ராமநாதன், பன்னீர்செல்வம், சிவசக்தி பாண்டியன், எஸ்.ஏ.சந்திரசேகரன், அமிர்தம், கே.முரளிதரன், ராதாரவி, எஸ்.வி.சேகர், வைரமுத்து, எல்.சுரேஷ், தேவா உள்ளிட்டோர் வாழ்த்து தெரிவித்தனர்.

விழாவில் ராம நாராயணன் பேசியதாவது: ஏழு ஆண்டுகளுக்கு பிறகு ‘குட்டிப்பிசாசு’ படத்தை இயக்குகிறேன். இது நான் இயக்கும் 120&வது படம். என் படங்களில் பெரிய நடிகர்கள் நடித்ததில்லை. கால்ஷீட் கேட்டு அவர்கள் முன் நிற்பதில்லை. அப்படி கேட்டு செல்லும்போது, ‘ராம நாராயணன் கால்ஷீட் கேட்கிறாரே’ என்று அவர்களுக்கு சங்கடம் ஏற்படும். அதனால் மிருகங்களை வைத்து படம் இயக்கினேன். அதற்கும் தணிக்கையில் தடை கொண்டு வந்தார்கள். இதனால் அஃறினை பொருளான காரை வைத்து இயக்கலாம் என்று ‘குட்டி பிசாசு’ இயக்கி உள்ளேன். கார் வைக்கவும் தடை வந்தால் சைக்கிளை வைத்து இயக்குவேன். ஏவி.எம், கே.பாலசந்தர் போன்றவர்கள்தான் எனக்கு மானசீக ஹீரோ, குரு. இவர்களுக்கெல்லாம் மேல் என்னுடைய பெரிய கதாநாயகன் முதல்வர் கருணாநிதிதான். இவ்வாறு ராம நாராயணன் பேசினார். ஆர்.கே.செல்வமணி, ஈ.ராமதாஸ், லாரன்ஸ், ராம்ஜி, சங்கீதா உள்பட பலர் பங்கேற்றனர்.