நடிகர் கமல்ஹாசனுக்கு நடக்கும் பாராட்டு விழாவில், மலையாள நடிகர்
சங்கத்தினர் கலந்துகொள்ள வேண்டும் என்று விழா கமிட்டித் தலைவர் சிவன்குட்டி
எம்.எல்.ஏ கூறினார்.
ஓணம் பண்டிகையை முன்னிட்டு கேரள அரசு சுற்றுலாதுறை
சார்பில், வருடம் தோறும் ஓணம் சுற்றுலா வார விழா கொண்டாடப்படும். இந்த
வருடம் வரும் 22&ம் தேதி இவ்விழா தொடங்குகிறது. திருவனந்தபுரம்
சந்திரசேகரன் நாயர் ஸ்டேடியத்தில் நடக்கும் இவ்விழாவில் கமல்ஹாசனுக்கு
பாராட்டு விழா நடத்த கேரள அரசு திட்டமிட்டுள்ளது. இதற்கு மலையாள நடிகர்
சங்கம் கடும் எதிர்ப்பு தெரிவித்துள்ளது. அச்சங்கத்தின் தலைவர் இன்னொசன்ட்
கூறும் போது, 'கமல்ஹாசன் சிறந்த நடிகர் என்பதில் மாற்றுக்கருத்தில்லை.
மலையாளத்திலேயே 50 வருடங்கள் சினிமாவில் பணியாற்றியவர்கள் இருக்கும் போது
ஏன் கமல்ஹாசனுக்கு விழா நடத்த வேண்டும்' என்று கூறியிருந்தார்.